UWW эртага ЖЧ-2020 бўйича расмий баёнот беради

Унда асосан шу йил декабрь ойида Сербияда ўтказиладиган ёшлар ва катталар ўртасидаги жаҳон чемпионатлари масаласи муҳокама қилинди. Лекин якунда жаҳон чемпионатининг белгиланган муддатда ўтказилиш юзасидан бир тўхтамга келинмади. 

Йиғилишда 50 та давлат федерация ва ассоциациялари ўз терма жамоаларини Белградга юбориш истагини билдиришди. Лекин аввалроқ UWW томонидан ўтган йилги жаҳон чемпионати иштирокчилари умумий сонининг камида 70 фоизи мусобақага келмаган тақдирда мусобақа ўтказилмаслиги айтилган эди. 

Бундан ташқари, ўтган йили Нур-Султондаги жаҳон чемпионати якунида Топ-10таликка кирган давлат терма жамоаларидан камида 8 таси Сербияга боришини тасдиқлаши шарт. Акс ҳолда бу йилги жаҳон чемпионати кечроқ муддатга, катта эҳтимол билан 2021 йилга қолдирилади. 

Дунёдаги эпидемиологик вазият ёмонлашгани сабаб жаҳон чемпионати масаласида якуний қарорга келинмади. Энди эртага, 8 октябрь куни UWW яна бир бор онлайн-йиғилиш ўтказади ва якуний қарорни эълон қилади.