UWW катта сайловлар арафасида

Бу биринчи галда сайловлар билан боғлиқ ҳолат. Бирлашган кураш дунёсининг навбатдан ташқари Конгрессида UWW президентлиги ҳамда Бюроси учун сайловлар ўтказилади. Коронавирус пандемияси билан боғлиқ вазиятни инобатга олган ҳолда сайловларнинг ўтказилиш тартиби аввалгиларидан фарқ қилади. Август ойида сайлов регламенти ҳамда мавсумнинг қолган қисми учун тақвим ҳам тасдиқланади. 

UWWда жами еттита лавозим учун сайлов ўтказилади: UWW президенти ҳамда Бюро аъзолиги учун 6 ўрин. Айни пайтда UWW президентлиги учун ягона номзод бор - амладаги ташкилот раҳбари Ненад Лалович. UWW президенти 6 йилга сайланади. 

Бюродаги ўринлар учун 14 даъвогар бўлиб, улардан 5 нафари амалдаги аъзолар ҳисобланади: Михаил Мамиашвили (Россия), Марина Ди Буссоло Пелликоне (Италия), Ахролжон Рўзиев (Ўзбекистон), Педро Гама Филью (Бразилия) ва Фуат Мескут (Марокаш). Шунингдек, 6 ўринга Дина Харенко (Украина), Ҳамид Сориан (Эрон), Лучио Канева (Италия), Эдишер Мачаидзе (Грузия), Дон Райан (Канада), Даниэль Игали (Нигерия), Жонни Замбрано (Эквадор), Марко Корпела (Финляндия) ва Ян Карснак (Словакия) кураш олиб боради. 

Маълумот учун, Бирлашган кураш дунёсининг Европа қўмитаси раҳбари Цено Ценов яқинда вафот этган эди. UWW-Европа раҳбарлигини вақтинча грециялик Теодорос Хамакос бажариб турибди. У бу лавозимда 2021 йил ўтказиладиган Европа чемпионати доирасидаги Ассамблеягача фаолият юритади.