UWW сентябрь ва октябрга мўлжалланган барча мусобақаларни бекор қилди

Унда UWW аввалроқ сентябрь ва октябрь ойлари учун тасдиқланган барча мусобақаларни бекор қилган. Ижроқўм аъзолари бир овоздан ҳозирда бутун дунёда давом этаётган коронавирус пандемияси билан боғлиқ вазият сабаб рестарт, яъни мавсумни куз фаслининг дастлабки икки ойида давом эттирмасликка қарор қилишган. 

Халқаро тақвимдан ўрин олган мусобақалар орасида ёшлар ўртасидаги Европа чемпионати (5-11 октябрь, Польша) ҳамда ўсмирлар ўртасидаги Европа чемпионати (19-25 октябрь, Шимолий Македония) ҳам бор эди.

"Дунёдаги коронавирус билан боғлиқ эпидемиологик вазиятни кузатишда давом этамиз, — деди UWW президенти Ненад Лалович. — Биз спортчиларнинг саломатлигини биринчи ўринга қўямиз. Хавф ортда қолганига ишонч ҳосил қилганимиздан кейингина курашчилар гиламга қайтишади".

Навбатдаги UWW Ижроқўм йиғилиши сентябрь ойида ўтказилиши маълум қилинди. Боиси, ноябрь ва декабрь ойларига мўлжалланган мусобақаларнинг тақдири ҳамон очиқлигича қолмоқда: ноябрда Финляндияда ўтиши режалаштирилган U-23 жаҳон чемпионати ҳамда декабрь ойида Сербияда ўтказилиши белгиланган ўсмирлар ҳамда катталар ўртасидаги жаҳон чемпионати.