Вашеро - Masters турнирларининг тарихий чемпиони!

Финалга қадар дунёнинг 204-ракеткаси бўлиб турган монаколик Валентен Вашеро мусобақа бош совринини қўлга киритди. У ҳал қилувчи финал учрашувида ATP рейтингида 54-поғонадан жой олган франциялик Артюр Риндеркнешни уч сет натижасига кўра мағлубиятга учратди - 4/6, 6/3, 6/3.

Бу билан Вашеро "Мастерс" турнирлари тарихида чемпион бўлган энг рейтинги паст теннисчига айланди. Бу теннисчиларнинг ўзаро ўтказган илк учрашуви бўлди. Икки соату 14 дақиқа давом этган баҳсда Вашеро 8, Риндеркнеш 11 та эйс зарбасини амалга оширди. Иккала теннисчи ҳам 1 тадан қўшхатога йўл қўйди. 

Валентен Rolex Shanghai Masters чемпионлиги учун 1020 рейтинг очкоси ҳамда 1 миллион 124 минг 380 доллар мукофот пулини қўлга киритди. Бу унинг бутун фаолияти давомида қўлга киритган мукофот пулларидан ҳам кўпроқдир. Бугун эълон қилинган рейтингда у дунёнинг 40-ракеткаси бўлди. Риндеркнеш эса 650 очко ва 597 890 $ ишлаб олди.