Василий Ломаченко қайтди, унинг иштирокидаги жангда нокаут қайд этилди

Оқшомнинг марказий жанги енгил вазн тоифасида украиналик Василий Ломаченко ҳамда австралиялик Жорж Камбосос ўртасида бўлиб ўтди. Вакант, яъни эгасиз бўлиб турган IBF чемпионлик камари учун кечган 12 раундлик жанг 11-раундда тўхтатилди. Тажрибали Ломаченко мезбон боксчини нокаут эвазига мағлубиятга учратди. Жоржнинг секундантлари рингга мағлубият тан олувчи оқ сочиқ улоқтиришди.

Василий Ломаченко бундан аввалги жангини Девин Хейнига қарши ўтказганди. Мутлақ жаҳон чемпионлиги учун кечган ўша жангда Девин шубҳали ва баҳсли ғалабани қўлга киритганди. Василийга эса реванш берилмаганди. Камбосос эса ўз ўрнида бундан олдинги жангида Макс Хьюзни енгиб, IBO чемпионлик камарини қўлга киритган эди.

Бугун Ломаченко фаолиятидаги 18-ғалабасини тантана қилди. Ҳисобида 3 та мағлубият ҳам бор. Камбосос эса бугун аксинча учинчи мағлубиятини қабул қилиб олди. Ғалабалари сони 21 талигича қолди.