Велоспорт бўйича Ўзбекистон чемпионати якунланди

Ўзбекистон Республикаси Жисмоний тарбия ва спорт вазирлиги ҳамда Велосипед спорти федерацияси ҳамкорлигида Чирчиқ – Ғазалкент трассаси бўйлаб 81.3 км масофада ўтказилган мазкур гуруҳ пойгаларида, асосан, пойтахтимиздаги Республика ихтисослаштирилган Олимпия заҳиралари мактаб-интернати, Қишки ва мураккаб техник спорт турлари бўйича Республика олий спорт маҳорати мактаби, Наманган, Хоразм, Фарғона вилоятлари, Тошкент шаҳри, шунингдек, Чирчиқ ихтисослаштирилган Олимпия заҳиралари мактаб-интернати жамоаларининг 80 нафар спортчиси совринли ўринлар учун даъвогарлик қилишди.

Тўрт босқичда давом этган пойгалар натижасига кўра, Чирчиқ шаҳри вакили Марат Суляев Ўзбекистон чемпионлигини қўлга киритди. Ғолибнинг бутун масофа бўйлаб ўртача тезлиги 38.93 км/соатга тенг бўлди. Эътиборлиси, мусобақада иккинчи ва учинчи совринли ўринларни банд этган Константин Элли ва Дамир Забиров ҳам Чирчиқ ихтисослаштирилган Олимпия заҳиралари мактаб-интернати тарбияланувчиларидир.