Велотрек: Республика очиқ турнири янги истеъдодларни кашф этди

Уч кун давом этган мусобақада жами 117 нафар велоспортчи ғолиблик учун ўзаро баҳс олиб боришди. Биринчи кун натижаларига кўра ўз йўналишларида ёшлар ўртасида Дмитрий Сирко ва Арсений Покосенколар ғолибликни қўлга киритишган бўлса, қизлар ўртасида София Каримова икки йўналиш бўйича ҳам тенгсиз, деб топилди. Ўспиринлар ўртасида белгиланган масофани биринчи бўлиб Руслан Нафиков босиб ўтди. Кичик ёшли велоспортчи қизлар ўртасида ўтган баҳсларда Асал Ризаева ғолиб бўлди.

Мусобақанинг иккинчи куни ҳам қизғин ва шиддатли вазиятларга бой бўлди. Дмитрий Сирко бу сафар ҳам ҳар икки йўналишда ғолибликни қўлдан бермади. Қизлар ўртасида чемпионлик ўз йўналишларида Анна Куликова ҳамда Маргарита Мисюриналарга насиб этди. Ўсмирлар ва қизлар ўртасида Руслан Нафиков ва Асал Ризаева 2-кунги баҳсларда ҳам пешқадам бўлишди.

Учинчи кунги баҳсларда ҳам Дмитрий Сирко ўзининг ушбу спорт турида пешқадам эканлигини исботлади. Қизлар ўртасида кечган баҳсларда София Каримова 1-ўринни эгаллади. Кичик ёш тоифасидаги мусобақаларда ҳам яна бир бора Руслан Нафиков ҳамда Асал Ризаева ғолибликни қўлга киритиб, барча йўналишлар бўйича мутлақ ғалабани қўлга киритди.