Владимир Кличко: «Томас Бах Олимпия қадриятларини эмас, Россия манфаатларини ифодалайди»

Владимир Кличко Халқаро олимпия қўмитаси президенти Томас Бахни россиялик спортчиларнинг 2024 йилда Парижда бўлиб ўтадиган Олимпиада ўйинларида иштирок этишига рухсат бермоқчилиги учун танқид қилди.

 «Томас Бах доим ХОҚ бетарафлиги ҳақида гапиради. Гап шундаки, Бах нейтрал эмас. У Олимпия қадриятларини эмас, Россия манфаатларини ифодалайди.

Спорт, бизнес ва сиёсатнинг бир-бирига ўхшаш томонлари бор. Айниқса, Олимпия ўйинлари доимо сиёсатнинг бир қисми бўлиб келган. Оқ ва нейтрал байроқ ҳақида гапирилганда, немис тилида яхши ибора бор: «Сен рангларингни кўрсатишинг керак». «Агар», «лекин» деган тушунчалар йўқ. Афсуски, Бах Олимпиядан ташқари қадриятларни ифодалайди.

У ташвиқотни қўллаб-қувватлайди. Россия Мудофаа вазирлиги ходимлари бўлган ва халқаро ҳарбий чемпионатларда қатнашган россиялик спортчилар энди навбатдаги ўйинларда иштирок этишни режалаштирмоқда. Россия пропагандаси ундан фойдаланади.

Мен ҳали бирорта фаол россиялик спортчининг ҳарбий ҳаракатларга қарши чиққанини кўрмадим. Бу уларни қўллаб-қувватлашини англатади. Ва биз аллақачон «З» белгисини кийган спортчиларни кўрдик. Улар бу ташвиқотни қўллаб-қувватламоқда.

Биз Оиламиз. Агар ХОҚ президенти ўз рангини кўрсатмаса, оила унга бизнинг манфаатларимизни ҳимоя қилишда ёрдам бериши керак. Улар бизни қўй каби бошқара олмайди», - деди Кличко.