Водилда кураш ва белбоғли кураш бўйича анъанавий мусобақа бошланди

Аниқроғи, шу қишлоқда туғилиб вояга етган, кураш мухлислари қалбидан жой олган, ўз даврининг номдор полвонлари бўлган - Хамид ва Темир полвонлар хотираси учун ҳамда 1 июнь - Халқаро болаларни ҳимоя қилиш куни муносабати билан белбоғли кураш ва кураш бўйича анъанавий республика очиқ турнири ўтказилмоқда.

Ўзбекистон Республикаси Туризм ва спорт вазирлиги,  кураш ва белбоғли кураш федерациялари тақвим-режасидаги мазкур очиқ турнирда мамлакатимиз ва қўшни Қирғизистон, Тожикистон республикаларидан 300 нафарга яқин полвон иштирок этмоқда. 

Юқори савияда ташкил этилган мазкур турнирда полвонлар белбоғли кураш бўйича 55 кг., 60 кг., 66 кг., 73 кг., 81 кг., 90 кг., 100 кг., +100 кг. вазн, кураш бўйича эркаклар 60 кг., 66 кг., 73 кг., 81 кг., 90 кг., +90 кг., аёллар эса 52 кг., 63 кг. ҳамда +63 кг. вазн тоифаларида беллашишмоқда. 

Ҳар иккала спорт тури бўйича беллашувлар бугун кун бўйи давом этади. Турнир якунига етгач, батафсил жараёнлар билан таништириб ўтамиз.

Илҳом РАҲМОНОВ Водил қишлоғидан тайёрлади