Волейбол: 2024 йилги натижалар сарҳисоб қилинди

Ички ишлар вазирлигининг маданият саройида ташкил этилган тадбирда Ўзбекистон волейбол федерацияси раисининг биринчи ўринбосари Б.Абдуллаев, спорт вазири ўринбосари Ш.Маҳмудов ва бошқа мутасаддилар иштирок этиб, ўтаётган йил мамлакатимиз волейбол жамоалари учун омадли бўлганини эътироф этди.

Таъкидланганидек, жорий йилнинг июль ойида давлатимиз раҳбарининг “Волейбол спорт турларини янада ривожлантириш тўғрисида”ги қарори қабул қилиниб, ушбу тарихий ҳужжат асосида кенг қамровли саъй-ҳаракатларга қўл ўрилди. Чора-тадбирлар режаси ишлаб чиқилди.

Йил давомида турли ёш тоифалари ўртасидаги мамлакат биринчиликлари тизимли тарзда юқори савияда ўтказилиши йўлга қўйилди. Халқаро ҳамкорлик алоқалари кенгайиши асносида ривожланган давлатларнинг волейбол мутахассислари, экспертлари билан амалий муносабатлар ўрнатилди. 

Халқаро волейбол федерацияси раҳбари бошчилигидаги делегация юртимизга ташриф буюриб, истиқболли лойиҳалар бўйича келишувларга эришилди. Мактаб, маҳалла, олий ўқув юртларида волейбол бўйича лига мусобақалари, кубок баҳслари ташкил этилди. Бунинг натижасида минг-минглаб ёшлар мазкур спорт тури билан қамраб олинди.

Тадбирда йилнинг энг яхши спортчилари, фидойи мураббийлар, ҳакамлар ва бир гуруҳ мутахассислар муносиб тақдирланди. Келгуси режалар белгилаб олинди.