Волейбол: икки нафар юртдошимиз CAVA доимий қўмиталари аъзосига айланди

Ушбу йиғилишда CAVA президенти жаноб Моҳаммад Латиф, ташкилот вице-президенти эронлик доктор Муҳаммад Ризо Даварзани, қозоғистонлик Емек Сирлибаев, CAVA ғазначиси жаноб Житендра Баҳадур Чанд, CAVA Бош котиби Қилич Сарбагишевдан иборат Ижроия қўмитаси аъзолари ҳамда CAVAга аъзо давлатлар вакиллари иштирок этишди.

Йиғилишда жаноб Латиф CAVA ўз тарихида яна бир муҳим воқелик, яъни ташкилот Низоми остидаги барча қонуний ҳужжатларни шакллантирганлигини эътироф этди.

Шунингдек, у Миллий федерациялар ва CAVAдан кўрсатилган барча аъзолар юқори малакали ва ўз соҳасида катта тажрибага эга эканлигини таъкидлади. Бинобарин, жаноб Латиф доимий қўмиталар фаолияти юксак даражада бўлишига шубҳа қилмайди.

CAVA президенти ҳамда Ижроия қўмита аъзолари барча доимий қўмиталарни ҳар томонлама қўллаб-қувватлаш ва амалий ёрдам кўрсатишини ваъда берди.

“Келинг, уларга CAVA Низомлари ва умумий қоидаларга мувофиқ ўз мажбуриятларини бажаришда тўлиқ мустақиллик ва ваколат берайлик”, деди жаноб Латиф анжуманда.

Учрашув давомида доктор Даварзани CAVAни янада кучлироқ қилиш учун барча федерациялар янада кўпроқ ҳаракат қилишлари, бир кучли жамоа сифатида Ассоциацияни яхшилаш учун биргаликда ҳаракат қилиши лозимлигини таъкидлади.

Ижроия қўмита аъзолари CAVA президенти жаноб Латифга ташкилотни яхшилашга қўшган ҳиссаси ва Миллий федерациялар ўртасида бирдамликни мустаҳкамлаш йўлидаги хизматлари учун миннатдорлик билдирди. Ўз навбатида жаноб Латиф барча аъзоларга бирдамлик ва қўллаб-қувватлаганлиги учун ташаккур изҳор қилди.

Йиғилишда икки нафар ҳамюртимиз CAVAнинг доимий қўмиталари аъзолигига сайланди. Жумладан, Маркетинг ва молия қўмитасига Аҳроржон Собиров, Ривожланиш ва мураббийлар қўмитасига Феруза Одилова номзоди маъқулланди.

Биз ҳамюртларимизга масъулиятли вазифада омад тилаймиз.