Волейбол: илк маротаба фахрийлар ўртасидаги Ўзбекистон чемпионати Урганчда ўтказилади

Ўзбекистонда ҳам ушбу спорт турига қизиқиш ниҳоятда юқори, десак муболаға бўлмайди. Бироқ, айрим сабабларга кўра юртимизда волейболни оммалаштириш ва ривожлантириш борасидаги ишлар оқсаётган эди.

Сўнгги йилларда Ўзбекистон волейбол федерацияси раҳбариятида амалга оширилган ўзгаришлар натижасида ушбу спорт тури ривожида янги давр бошланди, дейиш мумкин. Аввало мусобақалар сони ошди. Эндиликда нафақат катталар ва ёшлар, ҳатто ўсмирлар ўртасида ҳам мусобақалар ўтказилиши йўлга қўйилди.

Мусобақаларни тизимли равишда ўтказишга ҳам алоҳида аҳамият қаратилмоқда. Барча ёш тоифасидаги мусобақалар халқаро қоидалар асосида ўтказилиши йўлга қўйилди. Бу эса ўйинлардан кейин турли норозиликларнинг келиб чиқиши, ҳакамликдаки нохолисликларга барҳам беришга хизмат қилмоқда.

2021-йил 20-23-май кунлари мамлакатимиз волейболи тарихида илк маротаба фахрийлар ўртасида Ўзбекистон чемпионати ўтказилади. Бу ҳам албатта юртимизда волейболнинг яна-да оммалашувига хизмат қилади.

Фахрийлар ўртасидаги Ўзбекистон чемпионатида ҳар бир жамоа таркибидан 11 нафар волейболчи (либеро билан бирга) ҳамда бир нафар тренер жой олиши мумкин. Жамоалар таркибига 40-44 ёш ҳамда 45-49 ёшдаги бир нафардан ҳамда 50 ёш ва ундан юқори бўлган 9 нафар иштирокчи киритилиши белгилаб қўйилган.

Мазкур мусобақа спортчилик фаолиятини якунлаган, бироқ тренерлик фаолияти билан машғул бўлмаган собиқ волейболчиларга яна катта спорт ҳавосини ҳис қилишларига ёрдам беради.