Волейбол: катталар Тошкентда, ёшлар термаси эса Навоийда йиғинга киришган

Мазкур йиғинга барча терма жамоалар 23 нафардан спортчини жалб қилган, яъни 23 нафар эркаклар терма жамоаси аъзолари ва 23 нафар аёллар терма жамоаси. Ёшлар термасида ҳам худди шундай.

Йиғинда техник-тактик машғулотлар билан бир қаторда спортчилар жисмоний тайёргарликни ошириш мақсадида бассейнда сузиш ва тренажёрларда ҳам шуғулланишмоқда. Шунингдек, умумжисмоний машқларга ҳам алоҳида эътибор қаратилмоқда.

Ўзбекистон волейбол федерацияси қарорига кўра, йиғин бошланиши олдидан ва якунида ҳар бир спортчидан жисмоний норматив олинади. Энг яхши жисмоний тайёргарликка эга спортчилар олдинда турган халқаро мусобақаларга жалб этилади. 

Таъкидлаш керак, волейбол бўйича терма жамоаларимизни яқин орада Марказий Осиё минтақаси мусобақалари ҳамда 21-бор ўтказилаётган қитъа чемпионати кутиб турибди.