Волейбол: ўсмирлар ва қизлар Ўзбекистон кубоги учун мусобақалашмоқда

Шу кунларда Фарғона шаҳрида республикамиздаги болалар-ўсмирлар спорт мактаблари ва ихтисослаштирилган болалар-ўсмирлар спорт мактабларининг тарбияланувчилари ўртасида Ўзбекистон кубоги ўтказилмоқда. Мусобақада 2005-2006 йилларда туғилган ўсмирлар ва қизлар жамоалари ғолиблик учун баҳс олиб боришяпти.

Жумладан, ўғил болалар ўртасидаги баҳсларда жами 10та жамоа икки гуруҳга бўлинган ҳолда курашга киришди. “А” гуруҳидан Фарғона, Андижон, Сирдарё, Самарқанд ҳамда Қашқадарё вилоятларининг ёш волейболчилари ўрин олишган бўлса, “Б” гуруҳини Қорақалпоғистон Республикаси, Наманган, Жиззах, Навоий ва Хоразм вилояти жамоалари тўлдиришди. Айрим сабабларга кўра мусобақада Тошкент шаҳри ва вилояти, Сурхондарё ҳамда Бухоро вилоятидан жамоалар иштирок этишмаяпти.

Қизлар ўртасидаги баҳсларда эса атиги 9та жамоа қатнашмоқда. Булар – Қорақалпоғистон Республикаси, Фарғона, Андижон, Наманган, Тошкент, Сирдарё, Жиззах, Қашқадарё ҳамда Хоразм вилоятлари волейболчи қизларидир.

Мусобақанинг очилиш маросимида Фарғона вилояти туризм ва спорт бош бошқармаси бошлиғининг ўринбосари Нодир Ҳакимов, Ўзбекистон волейбол федерацияси Бош котиби Хусан Насруллаев ва бошқалар сўзга чиқиб, ёш волейболчиларга бўлажак мусобақада омад тилашди.

Волейбол бўйича БЎСМ ва ИБЎСМларнинг тарбияланувчилари ўртасида Ўзбекистон кубоги ғолиблари 3 декабрда маълум бўлади.