Хаби Алонсо "Ливерпуль" билан музокаралар олиб бормоқда, Слотнинг курсиси қимирлаб қолди

"AS" нашри хабарига кўра, "Ливерпуль" раҳбарияти испаниялик мутахассиснинг вакиллари билан алоқага чиққан.

Манбанинг таъкидлашича, томонлар ўртасидаги дастлабки музокаралар ижобий руҳда ўтган. Хаби Алонсо ўз вақтида футболчи сифатида тўп тепган жамоасига мураббий бўлиб қайтишга "қатъий қарор қилган". Мерсисайдликлар эса Алонсога нафақат мутахассис, балки клуб афсонаси сифатида катта ҳурмат ва эҳтиром билан қарашмоқда.

Қайд этилишича, жамоанинг ҳозирги натижалари амалдаги бош мураббий Арне Слотнинг келажагини хавф остида қолдирмоқда. "Ливерпуль"нинг ҳар бир омадсиз ўйини Хаби Алонсонинг тайинланишини яқинлаштирмоқда.

Эслатиб ўтамиз, Алонсо ўтган ёзда "Реал Мадрид" бошқарувига келган эди, бироқ жорий йилнинг 12 январь куни "қироллик клуби" у билан хайрлашганини эълон қилди. Ҳозирда "Ливерпуль" АПЛда 23 та ўйиндан сўнг 36 очко билан 4-ўринни эгаллаб турибди.