Хачанов US Open 1/4 финалига чиқди, у Медведев учун реванш олишга уриниб кўради

Дунёнинг 31-ракеткаси бўлиб турган Карен Хачанов мусобақанинг чорак финал иштирокчисига айланди. Россиялик теннисчи нимчорак финалда ATP рейтингида 15-ўриндан жой олган испаниялик Пабло Карреньо-Бустани 5 сет натижасига кўра мағлуб этди - 4/6, 6/3, 6/1, 4/6, 6/3. 

Уч соату 23 дақиқа давом этган баҳсда Карен 11, Буста эса 9 та эйс зарбасини амалга оширган. Теннисчиларнинг ўзаро учрашувларида Хачанов 6:3 ҳисобида олдинга чиқиб олди. Иккала теннисчи ҳам 6 маротабадан қўшхатога йўл қўйган. Энди россиялик теннисчи чорак финалда Ник Киргиосга қарши кортга чиқади. Айнан австралиялик теннисчи нимчорак финалда дунёнинг биринчи ракеткаси, US Open мусобақасининг амалдаги ғолиби Даниил Медведевни мағлуб этган эди.