Халқаро текбол федерацияси, Халқ таълими вазирлиги ва МОҚ ўртасида ҳамкорлик меморандуми имзоланди

Текбол спортини мамлакатимизда ҳам оммалаштириш мақсадида ташкил қилинган ушбу сафар давомида яна бир муҳим қадам ташланди. Бугун МОҚ анжуманлар залида Халқаро текбол федерацияси, Ўзбекистон Республикаси Халқ таълими вазирлиги ва Ўзбекистон Миллий олимпия қўмитаси ўртасида уч томонлама ҳамкорлик меморандуми имзоланди. Мазкур тадбирда Халқаро текбол федерацияси Бош котиби кичик-Мариус Визер, Халқ таълими вазири Шерзод Шерматов, МОҚ Бош котиби Ойбек Касимов, МОҚ раиси ўринбосари, Ўзбекистон дзюдо федерацияси раиси Азизжон Камилов, яқин ўтмишимизнинг таниқли футболчилари иштирок этишди. 

Тадбир аввалида Шерзод Шерматов имзоланажак меморандум ҳақида ўз фикрларини билдириб ўтди.

“Тадбиримиз аввалида ушбу спорт турининг қизиқарли эканлигига яна бир карра амин бўлдим. Бу ўйин мактабларимизда ўқувчиларининг севимли ўйини бўлишига ишонаман. Унинг ёрдамида 5-6 хил спортни мужассамлаштириш мумкин. Бу эса ёшларимиз орасида соғлом турмуш тарзи тарғиботи йўлида, ўқувчиларимизнинг бўш вақтларини мазмунли ўтказишда айни муддао”, – деди Халқ таълими вазири.

Шунингдек, МОҚ Бош котиби истиқболли ҳамкорлик ҳақида шундай дейди:

“Халқаро текбол федерациясининг юртимизда ушбу спорт турини тарғиб қилиш борасида кўрсатаётган ташаббуси учун раҳмат айтиб ўтамиз. Ҳақиқатда, ушбу спорт бутун дунёда жуда тез суратларда ривожланиб бормоқда. Текбол муҳтарам Президентимиз томонидан илгари сурилаётган соғлом турмуш тарзи тарғиботи учун жуда мос келади. Бу спорт келажакда Осиё ва Олимпия ўйинлари дастурига кириши мумкин. Сизлар билан ҳамкорликда ишлашдан мамнунмиз”.

Тадбирда халқаро ташкилот Бош котиби ҳам сўз олиб, имзоланадиган меморандум, унинг моҳияти ва томонларнинг мажбурияти ҳақида гапириб ўтди. Унга кўра, Халқаро текбол федерацияси Ўзбекистонга яқин келажакда 10 минг дона текбол инвентарларини етказиб беради. Халқ таълими вазирлиги ва МОҚ эса юртимизда ушбу спорт турини оммалаштириш борасида ҳамкорликда ишлайди.

Шундан сўнг томонлар ҳамкорлик меморандумига имзо чекишди. Тадбир якунида Фарҳод Тожиев, Темур Кападзе, Ислом Иномов каби футболчиларимиз халқаро ташкилот вакиллари билан кўргазмали ўйинда ушбу спорт тури билан яқиндан танишишди.