Ўзбекистон текбол федерацияси Адлия вазирлигидан рўйхатдан ўтди

Федерациянинг ушбу ҳужжатини МОҚ Бош котиби, Ўзбекистон текбол федерацияси раиси Ойбек Касимов қабул қилиб олди. Жорий йилнинг ўзида текбол бўйича биринчи Ўзбекистон чемпионати ташкил этилиши режалаштирилган.

Текбол 2014 йилда венгриялик икки футбол фанатлари томонидан ўйлаб топилган бўлиб, асосчилари собиқ профессионал футболчи Габор Боршани ва дастурчи Виктор Хусар ҳисобланишади. У футбол ва стол теннисининг уйғунлашган кўриниши ҳисобланади.

Март ойида Халқаро текбол федерацияси раҳбарияти юртимизга ташриф буюриб, ушбу спорт тури бўйича катта тақдимот ўтказган ва уни мамлакатимизда оммалаштириш йўлида Халқаро текбол федерацияси, Халқ таълим вазирлиги ва Ўзбекистон Миллий Олимпия қўмитаси ўртасида ҳамкорлик меморандуми имзоланган эди.

Ана энди ушбу спорт тури бўйича терма жамоамиз йирик халқаро мусобақаларда юртимиз шарафини ҳимоя қилиши мумкин. Шубҳасиз, мамлакатимизда бу каби қизиқарли спорт турларининг ортиб бориши юртимизда соғлом турмуш тарзини тарғиб қилиш йўлида аҳамиятли.