Жон Маккарти UFC`дан четлатилиш сабабларини айтди

"Катта" Жоннинг сўзларига кўра, бунга сабаб Беллаторда шарҳловчи сифатида иш бошлагани бўлган, бу эса Уайтга ёқмаган.

"Бунинг сабаби шундаки, мен "Bellator"да ишга киришдим ва Дана Уайт табиийки, бу қароримдан жуда хафа бўлди. У: "Мен уни кўришни истамайман", деди. Сиз атлетика комиссиялари турнирларда қайси расмий шахслар ишлашини ҳал қилишини қанча айтсангиз ҳам, агар UFC келиб: "Биз бу одамни истамаймиз", деса, комиссия "майли" деб жавоб беради. Ишлар шундай бўлади. Лекин ҳечқиси йўқ, ҳаммаси яхши. Улар ишлашдан хурсанд бўлган одамлар номзодларини таклиф қилишади ва уларга бундай ҳуқуқ бўлиши керак", - деди Маккарти Ариэль Хельвани билан суҳбатда.

2025 йилнинг октябрь ойида 64 ёшли Жон Маккарти етти йилдан сўнг биринчи марта рефери сифатида октагонга қайтди ва бўйнидаги операциядан сўнг жисмоний ҳолатини тиклаганидан кейин фаолиятини давом эттирди.

Ҳозирда Маккарти фаол равишда медиа ва таҳлилий фаолият билан шуғулланмоқда. Собиқ Strikeforce чемпиони Жош Томсон билан биргаликда "Weighing In" подкастини ривожлантирмоқда.