Карлос Пратес UFC`даги гонорарини маълум қилди: "Жуда хурсандман!"

Бразилиялик аралаш яккакураш устаси шунинг баробарида октагонга чиқиш учун бир миллион доллардан ортиқ маблағ олишини айтди.

"Жанг учун бир миллион доллардан ортиқ. Мен жуда хурсандман. Ҳақиқатан ҳам жуда хурсандман. Саккизта жангнинг ҳаммасини ўтказаманми, билмайман. Балки иккита, учта ёки умуман битта. Қачон фаолиятимни якунлашимни айта олмайман. Балки эртага, балки кейинги жангдан кейин. Билмайман. Мен шунчаки кунлик яшашни яхши кўраман.

Мен пул топишни, барчани мағлуб этишни, чемпион бўлишни хоҳлайман ва қачонки менга ҳаммаси ёқмаса – кетаман. Қачонки мен энг яхшилар билан рақобатлаша олмаслигимни, биринчи рақам бўла олмаслигимни ҳис қилсам, жангни давом эттиришнинг маъноси қолмайди. Балки ўшанда фаолиятимни якунлайман", - деди бразилиялик Fighters Weekly нашрига берган интервьюсида.

Янги шартнома бўйича Карлос Пратеснинг биринчи жанги 30 январь куни Торонто шаҳрида бўлиб ўтадиган UFC 336 турнирида мағлубиятсиз эквадорлик Майкл Моралесга қарши бўлиб ўтади. Бу жангда у ярим ўрта вазн тоифасида вақтинчалик чемпионлик камарини қўлга киритишга уринади.