Халқаро велосипедчилар иттифоқи спорт департаменти директори Миллий олимпия қўмитасида меҳмон бўлди

Бундан кўзланган мақсад – Халқаро велосипедчилар иттифоқи ва Ўзбекистон велосипед спорти федерацияси ўртасидаги ҳамкорлик алоқаларини янада ривожлантириш, мураббийлар малакасини ошириш, спортчиларнинг тайёргарлик кўриш жараёнлари каби масалалар бўйича ўзаро фикр алмашишдан иборат эди.

Музокара давомида шунингдек, Ўзбекистонда велоспортини янада оммалаштириш, терма жамоаларга иқтидорли спортчиларни саралаш, уларни мусобақаларга тайёрлаш учун зарур бўлган шарт-шароитларни яратиш, халқаро велосипедчилар иттифоқи ва Ўзбекистон велосипед спорти федерацияси ўртасидаги қўшма лойиҳаларни кўпайтириш борасида сўз борди.

Аввал хабар бериб ўтганимиздек, 2019 йилнинг март ойида Ўзбекистонда велоспортнинг шоссе йўналиши бўйича илк маротаба катталар ва ёшлар ўртасида Осиё чемпионати («2019 Asian Road Para & Cycling Championships») бўлиб ўтади. Бугунги учрашувда томонлар қитъа чемпионати учун халқаро талаб ва стандартларга жавоб берадиган инфратузилмани яратиш бўйича ҳам ўзаро фикр алмашдилар. МОҚ Бош котиби айни пайтда Тошкентда велотрек қурилиши жараёни жадал суратларда давом этаётганлиги, у жаҳон стандарти асосида бунёд этилаётганини маълум қилди.

Шунингдек, Тошкент вилоятида велодром қурилиши бўйича амалий ёрдам, Олимпия ўйинлари дастурига киритилган “BMX” ҳамда “Маунтинбайк” йўналишларида иштирок этадиган спортчи ва мураббийларнинг тажрибасини ошириш бўйича масала ҳам кўриб чиқилди. Маълумот учун, пойтахт вилоятида қурилаётган ушбу велоспорт мажмуаси Халқаро велосипедчилар иттифоқи (UCI) ва Осиё велоспорт конфедерацияси (ACC) кўмагида барпо этилмоқда.

Яна бир қувончли хабар: Энди ўзбекистонлик истеъдодли спортчилар Швейцариядаги халқаро велоспортчилар тайёрлаш марказида ўз маҳоратларини оширишлари мумкин бўлади. Ушбу ҳамкорликнинг дастлабки босқичида икки нафар ҳамюртимиз у ерда ўз малакасини ошириб қайтади.

Учрашув якунида Жасур Матчанов анъанага кўра мартабали меҳмонга Миллий олимпия қўмитаси номидан эсдалик совғалари топширди.


Ўз навбатида жаноб Фредрик Магне Халқаро велосипедчилар иттифоқи президенти Давид Лапартьен номидан МОҚ Бош котибига совға улашди.


Таъкидлаш лозимки, учрашув мамлакатимиз раҳбарининг 2017 йил 9 март куни имзолаган «Ўзбекистон спортчиларини 2020 йил Токио шаҳри (Япония)да бўлиб ўтадиган XXXII ёзги Олимпия ва XVI Паралимпия ўйинларига тайёрлаш тўғрисида»ги қарори ижросини таъминлаш йўлида навбатдаги қадамлардан бири бўлди.