18 янв 11:02
Янгиликлар

Бокс/ММА

Хамзат Чимаев фаолиятидаги энг қийин жангни айтди

Ўрта вазн (84 кг гача) тоифасида амалдаги UFC чемпиони, мағлубият нималигини билмай келаётган Хамзат Чимаев шу кунгача ўтказган энг қийин жанги ҳақида берилган саволга жавоб берди.

БАА фуқаролигига эга россиялик 31 ёшли аралаш яккакураш устаси ярим ўрта вазн тоифасида собиқ UFC чемпиони нигериялик Камару Усман билан жанг фаолиятидаги энг қийини бўлганини тан олди. Ушбу жанг UFC 294 турнири доирасида бўлиб ўтган ва унда ҳакамлар қарорига кўра Борз ғалаба қозонган эди.

"Ўшанда мен Швециядан БААга эндигина кўчиб ўтгандим, шунинг учун машқ қилишим қийин бўлганди. Ёнимда яхши жамоа йўқ эди, фақат бир нечта дўстим бор эди холос. Шу сабабли Камару билан жанг мен учун жуда қийин кечганди", - дея Чимаевнинг сўзларини келтиради Red Corner MMA’нинг Х ижтимоий тармоғидаги саҳифаси.