Хамзат Чимаев кейинги жанги санасини эълон қилди

Швециялик аралаш яккакураш устаси 4 март куни АҚШнинг Невада штати Лас-Вегас шаҳрида октагонга кўтарилади. Ҳозирча рақиб номи расман маълум эмас. Бу ҳақда Чимаевнинг ўзи хабар берди. 

"Мен аллақачон машғулот лагеридаман. Лекин ҳозирча рақибим ким бўлишини билмайман. Номлар тез-тез ўзгаряпти. Ҳар ҳафта менга қўнғироқ қилиб, рақиб ўзгарганини айтишяпти. Мен билан жанг қилишни истаётганлар кўп, лекин иш шартнома имзолашга келганида ҳамма қочиб қоляпти. Менга тўртта давлатдан тўрт рақиб беришди. Лекин якунда ҳеч бири жангга рози бўлмади. Кўрамиз нима бўлар экан, аммо мен 4 март куни Лас-Вегасда октагонга чиқмоқчиман", - деди "Борз". 

Асли келиб чиқиши чеченистонлик бўлган Хамзатнинг айтишича, у яримўрта ва ўрта вазн тоифаларида жанг қилишга тайёр. Шу жумладан, ўрта вазннинг янги чемпиони Алекс Перейра билан ҳам. 

"Яримўрта ёки ўрта вазн – менга умуман фарқи йўқ. Рақиб беришса бўлгани. Очиғи, рақиб кутишдан чарчадим. Ижтимоий тармоқда рақиб излаш менга ярашмайди. Кейинги жангим чемпионлик бўлиши керак. Алекс Перейранинг рекорди 6-1. У мағлубиятга учраган, мен эса ҳаётимда ҳам ютқазмаганман. UFC ҳам бу жангни хоҳлаяпти. Лекин Перейра жангдан қочяпти. Бу ҳолатда нима қила оламан?", - дея сўзига якун ясади Чимаев. 

Маълумот учун, 28 ёшли Хамзат Чимаев сентябрь ойида америкалик Кевин Холандни жанг якунланишига уч дақиқа қолган бир пайтда бўғиш усун билан мағлубиятга учратган ва UFC промоушенидаги ғалабали сериясини олтита жангга етказиб олганди.