Ханчжоу-2022, Париж-2024: Бадминтон ва чим устида хоккей федерацияларининг тақдимоти тингланди

Кеча Ўзбекистон чим устида хоккей ва Ўзбекистон бадминтон федерацияларининг тақдимотлари тингланди. ZOOM платформасида ўтган тадбирда МОҚ президенти Рустам Шоабдураҳмонов бошчилигидаги қўмита мутасаддилари, Жисмоний тарбия ва спорт вазирлиги вакиллари, Ўзбекистон чим устида хоккей ҳамда Ўзбекистон бадминтон федерациялари раҳбарияти ва мураббийлари қатнашишди.

Таъкидлаш жоиз, ҳар икки йўналишда ҳам Токио-2020 Олимпия ўйинларига қўлга киритиладиган йўлланмаларимиз йўқ ва бу борада имкониятлар ҳам қолмаган. Шу боис бор эътибор бўлажак мусобақаларга қаратилган.

Чим устида хоккей спортида жамоани тўлиқ шакллантириш бўйича қатор масалалар мавжуд. Мураббийлар штабининг маълум қилишича, айни пайтгача терма жамоа вакиллари учун керакли спорт инвентарлари етишмайди. Сифатли майдон эса фақат Андижон вилоятида бор. Федерация мутасаддилари ўз тақдимотларида жамоани тўлиқ шакллантириш учун нафақат керакли инвентарлар, балки тиббий-фармокологик воситалар билан таъминлаш масалаларига ҳам алоҳида эътибор қаратишган. Шунингдек, ўқув-машғулот йиғинларини ташкил қилиш учун Тошкентда барпо этиладиган базага ушбу спортнинг махсус майдон қопламасини олиб келиш борасида иш кетаётгани маълум қилинди.

Бадминтон спорти Осиё миқёсида кучли ривожланишга эга. Сўнгги Олимпия ўйинларида ҳам совриндорларнинг аксарияти қитъадошларимиз ҳисобланишади. Шу боис сариқ қитъада Олимпия ўйинларига лицензия қўлга киритишнинг ўзи бир мунча мушкул вазифа. Ўзбекистон бадминтон федерацияси томонидан тайёрланган тақдимотда бу жиҳатга алоҳида урғу берилди. Терма жамоа мураббийи Олег Саватюгин лицензион ўриндан жой олиш учун бадминтончиларимиз доимо йирик халқаро мусобақаларда иштирок этиб боришлари зарурлигини таъкидлади. Зеро, ушбу спорт турида лицензиялар йирик мусобақаларда қайд этилган энг яхши натижалар бўйича тузилган рейтингга қараб тақсимланади. Қолаверса, спортчиларимиз кучли спарринг рақиблари билан ишлашлари, улар учун керакли инвентарларни таъминлаш бўйича ҳам фикрлар билдирилди.

Тадбирда иштирок этган МОҚ раҳбари мазкур режалар бўйича ўз фикрларини билдириб ўтди.

“Бир вақтлар, айниқса, чим устида хоккей бўйича кучли анъанага эга жамоамиз бўлганини яхши биламиз. Насиб қилса, биргаликда ўша жамоани қайта тиклаймиз. Бадминтон бўйича ривожланишнинг янги босқичига чиқамиз. Бунинг учун ҳаммамиз баҳамжиҳат ишлашимиз лозим. Режалар билан танишиб чиқдим. МОҚ ва Жисмоний тарбия ва спорт вазирлиги Сизларни қўллаб-қувватлайди. Бу борада барча шароитларни яратиб беришга тайёрмиз”, – деди Рустам Шоабдураҳмонов.