Ханчжоу-2022 ва Париж-2024: Муҳокама марказида Ўзбекистон триатлон федерацияси

Ўзбекистон триатлон федерацияси бу борадаги режалари билан таништирди. ZOOM платформасида ўтган йиғилишда МОҚ раиси Рустам Шоабдураҳмонов, Ўзбекистон триатлон федерацияси мутасаддилари ва терма жамоа мураббийлари, МОҚ ходимлари иштирок этишди. 

Тақдимотни федерация бош котиби Елена Кун олиб борди. Мутахассис Ханчжоу ва Париж мусобақаларига тайёргарлик стратегияси қатори, юзага келаётган муаммолар борасида ҳам тўхталиб ўтди. 

Унга кўра, ҳозирда терма жамоанинг муқим шуғулланиши учун моддий-техник база етишмаслиги асосий масалалардан бири бўлиб турибди. Ўз ўрнида МОҚ раиси бу муаммо қисқа кунлар ичида Жисмоний тарбия ва спорт вазирлиги ҳамда Республика Олимпия захиралари коллежининг мутасадди раҳбарлари орқали ҳал қилинишини таъкидлади.

“Триатлонни ривожлантириш борасида катта иш олиб бормоқдасизлар. Сўнгги даврда кўплаб вилоятларимизда триатлон янада оммалашди. Унинг тарғиботини кучайтириш борасида бўлимлари ҳали очилмаган вилоятларимизда ҳам ҳудудий филиаллар очиш зарур. Биз Сизларнинг ёрдамчингизмиз. Биргаликда олға ҳаракат қилишимиз керак. Ҳукуматимиз бизни доимо қўллаб-қувватлаб келмоқда. База борасидаги масалани Республика Олимпия захиралари коллежи ҳудуди орқали ҳал қилишни таклиф қиламан. Ишонамизки, ушбу маскан бу масалада бизга ёрдам беради”, – деди Рустам Шоабдураҳмонов.

Маълум қилинишича, ҳозирда триатлон бўйича терма жамоамиз таркибига 24 нафар спортчи киритилган. Суҳбат давомида жамоа иштирок этадиган халқаро ва маҳаллий ўқув-машғулот йиғинлари, мусобақалар атрофлича муҳокама қилинди. МОҚ раиси жамоа шифокорига спортчиларнинг саломатлигини қаттиқ назоратга олиш, барча эпидемиологик талаб ва қоидаларга риоя қилиш борасида топшириқлар бериб ўтди.