Хайме Мунгия Деревянченкодан кейин Чарло билан жанг қилмоқчи

Мексикалик боксчи, ўрта вазн тоифасида собиқ жаҳон чемпиони Хайме Мунгия (41-0, 33 КО) ўрта ва иккинчи ўрта дивизионнинг энг кучли вакиллари билан рингга кўтарилишга тайёрлигини яна бир бор маълум қилди.

"Албатта, ҳозир мен учун энг муҳими Деревянченко билан жанг. Агар унда ҳаммаси яхши кетса, мен Чарло, Бенавидес, Головкин каби йирик номлар билан учрашишни мақсад қилганман. Булардан бири йилни якунлаш учун жуда катта жанг бўларди", - деди Мунгия.

Эслатиб ўтамиз, 10 июн куни Онтариода (Калифорния, АҚШ) Мунгия ўрта тоифадаги чемпионлик учун собиқ давогар украиналик Сергей Деревянченко (14-4, 10 КО) билан жанг қилади.