Хоккей бўйича жаҳон чемпионатида финалчилар аниқланди

Ўз тарихида 49-маротаба ташкил этилаётган дунё биринчилигининг 1/2 финалида АҚШ терма жамоаси Чехияни ишончли тарзда мағлубиятга учратди - 4:1. Гейб Перро, Оливер Мур, Коул Айзерман ва Райан Леонард томонидан киритилган шайбаларга чехлардан Якуб Штанцль битта аниқ зарба билан жавоб қайтарди. 

Энди АҚШ терма жамоаси жаҳон чемпионлиги учун Финляндияга қарши музга чиқади. Финлар иккинчи 1/2 финал жуфтлигида Швецияни овертаймдаги гол эвазига 4:3 ҳисобида мағлуб этди. Финал учрашуви 6 январь куни бўлиб ўтади. Бугун тунда эса Чехия ва Швеция терма жамоалари ўзаро ўйинда бронза медаль эгасини аниқлаб олишади.