ХОҚнинг навбатдаги сессиясида самбони доимий тан олиш масаласи кўрилади

Бугун Япониянинг Токио шаҳрида Халқаро Олимпия қўмитасининг навбатдаги сессияси бошланади. Онлайн тартибда ўтказиладиган ушбу сессия 12 мартга қадар давом этади. Унда самбо спорт турини тан олиш масаласи кўриб чиқилади.

Самбо Олимпия оиласига кириш ниятини 2009 йилда маълум қилган эди. Халқаро самбо федерацияси (FIAS) ХОҚ томонидан 2018 йилнинг ноябрида вақтинча тан олинган. Ўтган йили коронавирус пандемиясига қарамасдан томошабинларсиз бўлса ҳам самбо бўйича жаҳон чемпионати ўтказилди. «Eurosport» телеканали томонидан олиб кўрсатилган жаҳон биринчилиги мусобақаларини 30 миллион телетомошабин кўрганлиги қайд этилди.

Самбо ХОҚ томонидан доимий тан олинса, FIAS спортнинг ушбу турини Олимпия ўйинлари дастурига киритиш борасидаги саъй-ҳаракатларни бошлайди. Мутасаддилар 2028 йилда Лос-Анжелесда бўлиб ўтадиган Олимпиада ўйинларида самбо бўйича ҳам мусобақалар бўлиб ўтишига умид боғлашмоқда.