Хоразм вилояти жисмоний тарбия ва спорт бошқармасига янги раҳбар тайинланди

Ўзбекистон Республикаси Жисмоний тарбия ва спорт вазирининг тегишли буйруғи билан, шу кунгача Урганч шаҳар якка кураш спорт турларига ихтисослаштирилган болалар-ўсмирлар спорт мактаби директори лавозимида фаолият юритиб келган Полвонов Ортиқ Мақсудбекович Хоразм вилояти жисмоний тарбия ва спорт бошқармаси бошлиғи вазифасини вақтинча бажарувчи этиб тайинланди.

Ортиқ Полвонов 1980 йил 19 ноябрь куни Урганч шаҳрида туғилган. Маълумоти олий. 2006 йили Урганч давлат университетининг жисмоний тарбия ва жисмоний маданият факультетини (сиртқи) тугатган. Оилали, уч нафар фарзанднинг меҳрибон отаси.

Меҳнат фаолиятини 2005 йили Урганч шаҳар ҳокимлиги маданият ва спорт ишлари бўлими оммавий спортни ривожлантириш ва спорт тадбирларини ташкил этиш бўйича бош инспектори лавозимида бошлаган.

2006-2013 йиллар мобайнида Хоразм вилояти ҳокимлиги маданият ва спорт ишлари бошқармаси тасарруфидаги 3-сонли болалар-ўсмирлар спорт мактаби директори, сўнгра Хоразм вилояти 2-сонли Олимпия захиралари ихтисослаштирилган болалар ва ўсмирлар спорт мактаби директори бўлиб ишлаган.

2016 йилдан шу кунгача Хоразм вилояти якка кураш спорт турларига ихтисослаштирилган болалар-ўсмирлар спорт мактаби директори лавозимида меҳнат қилиб келаётган эди.

Жисмоний тарбия ва спорт вазирлиги Ортиқ Полвоновга масъулиятли лавозимда омад тилайди.