Хоразм – юнон-рум кураши ривож топаётган маскан

Мамлакатимизда ушбу спортнинг учта йўналиши: эркин, юнон-рум ва аёллар кураши ҳам бирдек ривож топиб бормоқда. Ҳудудларда спорт курашларини янада ривожлантириш ва оммавийлаштириш йўлида кенг кўламдаги ишлар амалга оширилмоқда. Асосийси, ёшларни спортнинг ушбу турига қизиқтириб олиш. Кейин эса иқтидор эгаси тайёргарликнинг турли босқичларида тобланади ва терма жамоа учун мос спортчига айланади.

Хоразм вилоятида юнон-рум кураши йўналишига 2016 йилда Ўзбекистон спорт курашлари ассоциациясининг вилоят бўлими ижрочи директори Ғаффорбек Фарходович Отажонов томонидан асос солинган. Амалга оширилаётган ишлар қисқа муддатда ўз самарасини бермай қолмади. 2018 йили ўтказилган мамлакат чемпионатида Хоразм вилояти спортчилари Саидбек Саидмуродов (-48кг), Ҳусниддин Олимбоев (-57кг) ўз вазн тоифаларида мамлакат чемпионига айланишди. Акбар Оллоёров (-38кг) эса кумуш медалга сазовор бўлди.

Маълумот учун, юнон-рум кураши 1896 йилда Олимпия ўйинлари дастурига киритилган. 1904 йилдан жаҳон, 1983 йилдан буён эса Осиё чемпионатлари ўтказилади.