Хушхабар! Токиога 10 нафар дзюдочи боради. Олимпиадада жамоавий баҳсларда ҳам иштирок этамиз

Жаҳон чемпионатидан кейинги рейтинг ўринлари бўйича 9 нафар (7 эркак, 2 аёл) дзюдочимизнинг Токиога бориши кутилаётганди. Шунингдек, қитъавий квота ва жамоавий микст баҳсларига бериладиган йўлланмадан ҳам умидимиз йўқ эмасди. 

Бугун бироз аввал рейтинг ўринлари расман ошкор қилинди. Аввалдан кутилган дзюдочиларимиз Токио-2020 Олимпиадаси лицензиясини қўлга киритишди ва энг муҳими, биз умид қилган ҳолат ҳам рўй берди. Фарангиз Ҳожиевага қитъавий квота тақдим этилди. Энди Токиога 7 эркак ва 3 нафар аёл дзюдочи билан борамиз. 

Энг қувонарлиси, дзюдо ватанида ўтажак тўрт йилликнинг энг нуфузли мусобақаси жамоавий микст баҳсларида энди Ўзбекистон терма жамоаси ҳам иштирок этади. IJF 130 давлат орасидан бор йўғи 12 тасига ушбу имкониятни тақдим этди. Тарихда илк бор бу имкониятга эга бўлдик. 

Шунда Ўзбекистон дзюдо терма жамоасининг умумий лицензиялари сони 11 та (10 яккалик + 1 жуфтлик )га етди.