Юнон-рум курашчиларимиз Хорватияга жўнаб кетишди

Режа бўйича "классикларимиз" 12-18 январь кунлари Хорватия пойтахти Загреб шаҳрида ўтказиладиган "Gran Prix Zagreb Open 2021" турнирида иштирок этишади. Бу юнон-рум кураши терма жамоамизнинг бир йиллик танаффусдан сўнг қатнашадиган биринчи халқаро мусобақаси ҳисобланади. 

Загреб турнири якунига етиши билан Хорватиянинг Пореч шаҳрида халқаро ўқув-машғулот йиғини бошланади. "Gran Prix Zagreb Open 2021" мусобақасида қатнашган аксарият терма жамоалар 18-29 январь кунлари оралиғида ўтказиладиган ушбу халқаро машғулотларда иштирок этади. Халқаро тоифадаги рефери, "Олтин ҳуштак" соҳиби Тоҳир Ғуломов халқаро турнирда ҳакамлик қилади.   

Маълумот учун, айни пайтда юнон-рум курашчиларимиз томонидан Токио Олимпиадасининг 3 та лицензияси бор. 2019 йил Қозоғистоннинг Нур-Султан шаҳрида ўтган жаҳон чемпионатида Элмурат Тасмурадов, Жалгасбай Бердимуратов ва Рустам Ассакалов Олимпиада йўлланмасини қўлга киритган эди. 

Хорватияга йўл олган таркиб:

55 кг: Жасурбек Ортиқбоев, Илҳом Баҳромов

60 кг: Исломжон Баҳромов, Феруз Тўхтаев, Муҳаммадқодир Юсупов

63 кг: Элмурат Тасмурадов 

67 кг: Маҳмуд Бахшуллоев, Мирзобек Раҳматов 

72 кг: Арам Варданян

77 кг: Жалгасбай Бердимуратов

97 кг: Жаҳонгир Турдиев

130 кг: Мўминжон Абдуллаев

Мураббийлар - Равшан Рўзиқулов, Рустам Қудратов, Заза Силагадзе

Ҳакам - Тоҳир Ғуломов

Массажчи - Узроб Турсуналиев