Юнон-рум курашчимиз Жаҳон чемпионати совриндори

Дунё биринчилигининг юнон-рум кураши баҳсларида ҳамюртимиздан бири совриндор бўлди. -55 кг вазн тоифасида юртимиз шарафини ҳимоя қилган Алишер Ғаниев аввалига бронза медали йўлидаги беллашувда венгриялик Эдмонд Домокосни 8-0 ҳисобида мағлуб этди. Кейин эса бронза медали учун кечган баҳсда эронлик Али Абдуллоҳ Аҳмади Вафадан 9-0 ҳисобида устун келди ва жаҳон чемпионати совриндорига айланди. 

Алишер Ғаниев жаҳон чемпионати доирасида халқаро нейтрал спортчи мақомида қатнашаётган россиялик Алибек Амировни 8-0, нимчорак финалда япониялик кучли рақиби Коҳеи Ямагивани 12-3 ҳисобида таслим этган эди. 

Шу тариқа, юнон-рум кураши бўйича Ўзбекистон ёшлар терма жамоаси жаҳон чемпионатидаги иштирокини 1 та бронза медали билан якунлади. Эркин курашчиларимиздан ҳам биргина Нодирбек Жуманазаров жаҳон чемпионатининг бронза медалига эга чиққан эди.