Залга 20 кунлигида келган чақалоқ, Олимпиада чемпиони, "Спорт Оскари" соҳиби, уч йилдан бери мағлуб бўлмай келаётган "Тилла бола" яна бир ёшга улғайди

Умиджон Жалолов 2002 йил 12 июль куни Бухоро шаҳрида туғилган. Отаси Ўткир ака Умиджон 20 кунлик чақалоқ пайти уни кураш залига олиб келган ва мураббий Латиф Халимовга "ўғлим Умиджон бугундан сизнинг шогирдингиз" дея ният қилган экан. Яхши ният, ярим давлат деб бежизга айтишмайди. Йигирма кунлигида эркин кураш залига келган чақалоқ орадан йиллар ўтиб, уни бутунлай забт этди.  

"Ўша кунни жуда яхши эслайман. Отаси Ўткир билан болаликдан қалин дўстмиз. Бундан 18 йил олдин залга 20 кунлик чақалоқни олиб келиб, у сенинг шогирдинг бўлади деганди. Ўтган йиллар давомида биз айтишга арзигулик ютуқлар ва шу билан бирга машаққатли йўлни босиб ўтдик. Мен Умиджон билан фахрланаман", - дейди Латиф ака. 

Халқаро тоифадаги спорт устаси Умиджон Жалолов ўсмирлар ўртасида икки карра Осиё чемпиони (2017, Бангкок), (2018, Тошкент), жаҳон чемпиони (2019, София), Аргентинада ўтказилган III ёзги ўсмирлар Олимпия ўйинлари ғолиби (2018, Буэнос-Айрес) ҳисобланади. У эришган натижалари учун "Спорт Оскари" - "Олтин мангуст" совринига ҳам эга чиққан. Биз у зафар қучган халқаро мусобақаларни ҳали санамадик. Бунга анча вақт керак бўлади. 

Фурсатдан фойдаланиб, уч йилдан бери мағлубият нималигини билмай келаётган, -57 кг вазн тоифаси етакчиси бўлишга интилаётган Умиджон Жалоловни бугунги унутилмас сана - таваллуд куни билан муборакбод этамиз.