"Hech qachon hech qachon dema". Messi va Ronaldu bir stol atrofida

Osiyo qitasida 2-marta, Yaqin SHarq mintaqasida ilk marta o'tkazilayotgan ushbu mundial oldingilariga nisbatan ko'proq etiborni o'ziga tortayotgani rost. Dastlab, musobaqaning 4 karra g'oliblari hisoblanmish italyanlarning jahon chempionatiga chiqa olmaganliklari katta shovshuv bilan tilga olingan bo'lsa, o'z tarixida ilk bor noodatiy vaqtda o'tkazilayotgan musobaqa boshlanishiga oz vaqtlar qolishi davomida ko'plab yulduzlarning birma-bir jarohat olib safdan chiqishlari yana bir ichki g'alayonlarga sabab bo'ldi.

Futbolchining ashaddiy dushmani hisoblanmish jarohat tufayli joriy mundialni Pogba, Kante, Mane, "abadiy omadsiz" - Marko Roys va yana bir nechta yulduzlarning tomoshabin bo'lib o'zlarining yonlarida o'tirishini muxlislar hazm qilib ulgurmasidanoq, amaldagi "Oltin to'p" sohibi Karim Benzema ham chap soni mushaklarining lat eyishi tufayli jahon chempionatinini o'tkazib yuboradigan bo'ldi.

Ushbu musobaqada bir bor ishtirok etishni orzu qiladigan yulduzlar ham topilsada, beshinchi bor va katta ehtimol bilan so'nggi ishtirokida unda g'olib sifatida yakunlash istagida bo'lgan ikki "gigant" borki, bu holat butun etiboringizni ushbu jahon chempionatini kiprik qoqmay kuzatishga majbur qila oladi.

37 yoshli Ronaldu va 35 yoshli Messi butun faoliyati davomida Pele va Maradona (har ikkisi ham futbolchilik faoliyati davomida "Oltin to'p"ga munosib ko'rilmagan) orzu qilgan boshqa ko'plab sovrinlarni yutdi, ammo jahon chempionligiga erisha olmadi. SHu sabab yoshi ham "bir joy"ga borib qolgan ikki "qariya" bu musobaqaga borlarini tashlaydi.

Ko'plab futbol muxlislari borki, bu ikki afsonaning bir jamoa tarkibida to'p surishlarini va bir-birlari bilan qanday tandem hosil qilishlarini juda orzu qilishadi. U ikkisi ham o'z intervyularida bir-biriga maksimal hurmat ko'rsatgan holda gapiradilar, ammo hozirga qadar hech bo'lmasa bir marta tushlik stoli atrofida ham o'tirmaganliklarini qistirib o'tishadi.

Lekin ushbu jahon chempionati oldidan shunday voqea sodir bo'ldiki, bu hodisa shu avlod futbol muxlislarining yodidan bir umr chiqmaydi. Mashhur brend - Lui Viton kompaniyasi hech qaysi klub uddalamagan ishni amalga oshirdi. Ronaldu va Messini birga o'ynatdi. Faqat futbol emas, shaxmatda.

Ushbu ajoyib kadrlar bir lahzada butun dunyoni "portladi". Ikkisi birgalikda deyilganda "hech qachon" deya og'iz yirtadiganlar yoqalarini tishlashga majbur bo'lishdi. Ana endi hamma narsa sodir bo'lishi mumkin. Bu ikki futbolchi futboldagi umrining so'nggi lahzalarida ham barchani hayrat ko'chasiga etaklay olishini yana bir bor isbotlashdi.

Endi aslo chalg'ishga haqqingiz yo'q. Barchasini yig'ishtiring, bor etiboringizni Qatar yashil maydonlariga qarating. Zero, sizdan keyingilarga uzoq yillar entikib gapirib bera olishingiz mumkin bo'lgan hodisalar bugundan boshlanmoqda.

Umar Murod tayyorladi