18 nafar bokschimiz Rossiyadan 14ta medal bilan qaytdi

Bir necha yildan beri ananaviy tarzda o'tkazib kelinayotgan mazkur turnirda bu yil har qachongidan ham ko'p – qariyb 300 nafar yosh charm qo'lqop ustasi ringga ko'tarildi. Ular safida Respublika olimpiya zaxiralari kollejining 18 nafar o'quvchisi ham g'oliblik uchun bahs olib bordi. Quvonarlisi, 18 nafar bokschimizdan 14tasi yakunda sovrindorlar safidan joy oldi.

Xalqaro turnirda mezbonlardan tashqari qo'shni Qozog'istondan ham iqtidorli yoshlar ishtirok etdi. Kecha g'olib sportchilarimiz Toshkent shahridagi Janubiy vokzalda kutib olindi.

- Taniqli bokschi, og'ir vaznda sobiq jahon chempioni bo'lmish Nikolay Valuev sovrini uchun ananaviy tarzda o'tkazib kelinayotgan xalqaro turnirning nufuzi yildan yilga ortib bormoqda. Buni joriy yilgi musobaqalarda jami 298 nafar yosh bokschi ishtirok etganiligi ham tasdiqlaydi. Musobaqada 18 nafar sportchi bilan qatnashib, ikkitadan oltin va kumush hamda 10ta bronza medalini qo'lga kiritdik. Sportchilarimizning har bir jangini Rossiya o'smirlar terma jamoasining murabbiylari kuzatib borishdi hamda shogirdlarimning mahoratiga yuqori baho berishdi. Ochig'ini aytish kerak, musobaqadagi raqiblarimiz kuchli edi, ammo bizning bokschilar ham ulardan kam emasligini amalda isbotlashdi. Tashkilotchilar musobaqaga sobiq Ittifoq respublikalaridan eng kuchli jamoalarni chaqirishganini aytishdi. 

Bilasiz, dunyo boksida Rossiya va Qozog'iston o'z o'rniga ega davlatlar sanaladi. Lekin shogirdlarim o'zbek boks maktabi vakillarining hech kimdan kam emasligini isbotlashdi. Buni xalqaro turnir davomida mutaxassislar ham etirof qildi. Endi shogirdlarim oldida turgan musobaqalarga kelsak, mart oyi oxiri aprel oyi boshida O'zbekiston chempionati o'tkaziladi. Ushbu musobaqada munosib qatnashishga harakat qilamiz, - dedi Sankt-Peterburgdagi xalqaro turnirda O'zbekiston sport delegaciyasiga rahbarlik qilgan murabbiy Akmal Hasanov.

Kezi kelganda takidlash kerak, 18 nafar bokschimizdan 14 nafarining yarim finalgacha etib borishi – bu o'zbek boks maktabining ertangi kuni ishonchli qo'llarda ekanini anglatadi. Natijalarimiz salmog'i bundanda ortishi mumkin edi, ammo...

Bugun havaskorlar boksining eng katta muammosi – hakamlik bo'lib, janglarda baholash mexanizmining shaffof emasligi boksning kelajagiga tahdid solmoqda. Uzoqqa bormaylik, o'tgan yili Xalqaro Olimpiya qo'mitasi havaskorlar boksini Olimpiya o'yinlari dasturidan chiqarib yuborish bilan tahdid qildi va bu masala hamon ochiq turibdi. Nikolay Valuev sovrini uchun o'tkazilgan xalqaro turnirda ham hakamlarning u yoki bu tarafga ochiqchasiga yon bosishi kuzatildi va eng yomoni jabrlanganlar qatorida yurtimiz bokschilari ham bor edi. Aks holda g'alabalarimiz salmog'i yanada ortgan bo'larmidi?!