6 sentyabr – kurash milliy sporti kuni tantanali nishonlandi

Kuni kecha Janubiy Koreyada o'tgan Xalqaro kurash associaciyasining kongressida tashkilot azoligiga yana 4 mamlakat qabul qilindi va bugun o'zbek kurashi dunyoning 140 mamlakatida o'z o'rini topmoqda. 

O'zbekiston Respublikasi Prezidentining 2017 yil 2 oktyabridagi qaroriga ko'ra ushbu sana kurash milliy sporti kuni deb belgilangan. Xalqimizning minglab yillik qadriyatlarini o'zida mujassam etgan kurashni yoshlar o'rtasida yanada targ'ib qilish, o'sib kelayotgan yosh avlodni sog'lom va barkamol voyaga etkazish mazkur sport turi vakillarining ham asosiy maqsadlaridan sanaladi.

Poytaxtimizdagi “Sog'bon” sport majmuasida o'tkazilgan kurash bayrami Birlashgan Millatlar tashkilotining “Bola huquqlari to'g'risidagi” konvenciyasi qabul qilinganining 30 yilligi bilan birgalikda nishonlanishi esa mushtarak maqsadlar yo'lidagi qadamlardan biridir.

O'zbekiston Respublikasi Bosh prokuraturasi va O'zbekiston kurash federaciyasi tomonidan tashkil etilgan ushbu tadbirda poytaxtimizdagi mehribonlik uyi tarbiyalanuvchilari yurtimizning nomdor kurashchilarining mahoratlaridan bahramand bo'lishdi. 

Tadbir davomida kuni kecha Janubiy Koreyada o'tgan jahon chempionatida yuqori o'rinlarni egallab qaytgan terma jamoamiz azolarining yoshlar bilan uchrashuvi ham tashkil etildi.

Kurash bayrami bolajonlarning o'yin-kulgulari bilan davom etdi. Sanatkorlarning chiqishlari esa bayramga zavq bag'ishladi.