AIBA ochkolarni hisoblashning yangi qoidalarini tasdiqladi

2017 yildan etiboran AIBA tashkiloti tomonidan o'tkaziladigan barcha turdagi musobaqalarda yangi ochkolarni hisoblash tizimidan foydalaniladi.

Ushbu yangilik ikki hafta avval Rossiyaning Sankt-Peterburg shahri mezbonlik qilgan yoshlar o'rtasidagi jahon chempionatida muvaffaqiyatli tarzda sinovdan o'tkazilgan edi.  

Yangi tizimga ko'ra, ringning to'rtta burchagida ochkolarni hisoblab boradigan hakamlar ishlaydi. Hakamlar komissiyasining raisi elektron ko'rsatkichda qayd etilgan ochkolarni nazorat qiladi. Jangning yakuniy natijasi bahs yakuniga etganidan keyingina oshkor etiladi. 

Endi hisoblar avvalgidek 3:0, 2:1 ko'rinishida bo'lmaydi. Aksincha, 5:0, 4:1, 3:2 ko'rinishida yakuniy natijalarda aks etadi. Muddatidan avval to'xtatiladigan janglar bundan mustasno.  

Eslatib o'tamiz, Rio-2016 Olimpiadasining boks musobaqasida hakamlarning qarorlari ko'plab noroziliklarga sabab bo'lgandi. Musobaqa jarayonining o'zida bir necha nafar hakam o'z ishidan ozod etilgan edi. Oktyabr oyida esa AIBA Olimpiadada ishlagan 36 nafar hakamni chetlatgandi.