Ajoyib! Humoyun Sultonov principial raqibini engib, Rafa Nadal Open chorak finaliga yo'l oldi

Mukofot jamg'armasi 74,825 evroni tashkil etuvchi Rafa Nadal Open by Movistar turnirida O'zbekistonning birinchi raqamli raketkasi — Humoyun Sultonov ham muvaffaqiyatli ishtirok etmoqda.

Kvalifikaciya bosqichida birinchi raqam ostida tasniflangan Humoyun Sultonov 1/2 finalda italiyalik Fabricio Andaloroni 6/3, 6/1, final uchrashuvida esa reytingning 493-pog'onasida borayotgan franciyalik Sasha Geymar Vayenburgni 6/4, 6/4 hisobida taslim etgandi. Asosiy to'rning 1/16 final bosqichida franciyalik 21 yoshli Robin Bertranga qarshi kechgan bellashuvda hamyurtimiz 6/2, 6/7(4), 6/4 hisobida g'alaba qozongan edi.

Bugun esa 25 yoshli tennischimiz asosiy to'rning nimchorak final bosqichi doirasida belgiyalik Rafael Kollinonga qarshi kortga chiqdi. Oltmish sakkiz daqiqa davom etgan bahsda Sultonov 6/3, 6/4 hisobida zafar quchdi.

Taqqoslash uchun, Humoyun Sultonov ATP reytingida 264-o'rinni egallab turibdi. Kollinon esa 199-o'rindan joy olgan. Bu tennischilar uchun o'zaro ikkinchi o'yin bo'ldi. Iyul oyida o'tkazilgan dastlabki uchrashuvda Rafaelning qo'li baland kelgan edi.