Australian Open. Elina Svitolinaning yurishi davom etadi

Dunyoning 23-raketkasi bo'lib turgan Elina Svitolina to'rtinchi davra ishtirokchisiga aylandi. Ukrainalik tennis malikasi uchinchi bosqichda WTA reytingida 95-pog'onada borayotgan shveycariyalik Viktoriya Golubichni ortiqcha qiyinchiliksiz mag'lubiyatga uchratdi - 6/2, 6/3.

Tennischilarning o'zaro ikkinchi uchrashuvida ham Elina raqibasidan ustun keldi. Oltmish etti daqiqa davom etgan bahsda Svitolina 2, Golubich 1 ta eys zarbasini amalga oshirdi. Ikkala tennischi ham 2 tadan qo'shxatoga yo'l qo'ydi. Breyklar tabiiyki, g'olib tennischida ko'proq bo'ldi - 5 ga 2. 

Svitolina Australian Open to'rtinchi bosqichida Linda Noskovaga qarshi kortga chiqadi. CHexiyalik tennischi o'z o'rnida dunyoning birinchi raketkasi, polshalik Iga Svyontekni musobaqadan chiqarib yuborgandi.