Bektemir bo'lajak raqibining kuchli jihatlari haqida gapirdi

CHarm qo'lqop ustamiz afsonaviy bokschi Oskar De La Xoyyaga qarashli "Golden Boy" promouterlik kompaniyasi tomonidan tashkil etiladigan oqshomda meksikalik Alan Kampaga qarshi ringga ko'tariladi. Bektemir bo'lajak raqibi haqida saytimiz uchun intervyu berdi.

"Meksikalik raqibim shu kunlarda malum bo'ldi. O'ziga yarasha kuchli bokschi ekanligi natijalaridan ko'rinib turibdi. Havaskor bokslda ham 180 taga yaqin janglarda ishtirok etgan ekan. Bu borada u katta tajribaga ega ekanligi aniq. SHundan kelib chiqib, murabbiylarimiz bilan birga bo'lajak jangga tayyorgarlik ko'ryapmiz. Kamchiliklari va ustun jihatlarini o'rganyapmiz. Meksikalik bokschilar chidamli bo'lishadi. Nasib qilsa, roppa-rosa bir oydan so'ng o'tkaziladigan jangda chiroyli g'alabam bilan yurtdoshlarimizni xushnud etishga astoydil harakat qilaman", - dedi Meliqo'ziev.

Malumot uchun, 28 yoshli Alan prof ringda 23 ta jang o'tkazgan bo'lib, ularning 17 tasida g'alaba qozongan. Beshta jangda mag'lubiyat (2 ta nokaut) alamini totib ko'rgan. O'zi esa 11 ta bahsda raqiblarini muddatidan avval taslim etgan. So'nggi jangini 2019 yilning 2 may kuni Erik Baziniyanga qarshi o'tkazib, mag'lubiyatga uchragan edi.