Bektemir Meliqo'ziev nima uchun jangi qoldirilgani va tayyorgarlik jarayoni haqida gapirdi

Avvaliga uning 24 iyul kuni ringga ko'tarilishi haqida malumot berilgandi. Lekin, bir necha kun oldin uning jangi avgust oyiga ko'chirilgani haqida xabarlar tarqaldi. 

SHu munosabat bilan bokschimiz bilan qisqa suhbat tashkil etdik. 

- Hozir qaysi shahardasiz? U erda ob-havo, muhit, sharoitlar qanday?

- Ayni paytda Los-Anjelesning Indio shaharchasidaman. Bu erdagi ob-havo issiq, harorat 48-49 darajagacha ko'tariladi. SHaroitlar yaxshi, zalda murabbiylarimiz qo'l ostida shug'ullanyapmiz. Navbatdagi jangga tayyorgarlik juda yaxshi ketmoqda. 

- Tayyorgarlikka oid savol: Kuniga necha mahal mashg'ulot olib borayapsiz?

- Jangga tayyorgarlik o'zining qizg'in pallasiga chiqqan. Bir kunda 2-3 mahal mashg'ulot o'tkazyapmiz. Dushanba, chorshanba va juma kunlari 3 martadan, qolgan kunlari esa 2 martadan mashg'ulotlar o'tkazilmoqda. Murabbiylar bilan birga texnik va taktik tomonlama ishlamoqdamiz. 

- Jang muddati surilibdi. Bunga nima sabab bo'ldi? 

- To'g'ri, avvaliga jang 24 iyulda bo'lishi kerak edi. Lekin mening Amerikaga qachon etib kelishim borasida aniq malumotlar yo'q edi. Bu borada shunday tushunmovchiliklar bo'lgani, tayyorgarlik uchun oz muddat qolgani ham sabab. Bundan tashqari, orada 4-5 oylik tanaffus bo'ldi, karantin vaqtida O'zbekistonda qolib ketdim va mashg'ulotlar nisbatan kamroq bo'ldi. Jangga bemalol, har tomonlama tayyorgarlik ko'rib chiqishim lozim. SHu sababli navbatdagi jang avgust oyiga ko'chirildi. 

- Raqib aniq bo'lib ulgurganmi?

- Hozircha kimga qarshi jang qilishim aniq emas. Ko'p bokschilar bilan muzokara olib borilmoqda, lekin nima uchundir ularning aksariyati rad javobini bermoqda. O'ylaymanki, tez kunlarda barchasi aniq bo'ladi va raqib nomi malum bo'lishi bilan xabarini beramiz.