Bektemir Meliqo'zievning raqibi va jang sanasi malum + POSTER

Xabaringiz bor, yaqinda hamyurtimiz AQSHga jo'nab ketgan edi. Bektemir afsonaviy bokschi Oskar De La Xoyyaga qarashli "Golden Boy" promouterlik kompaniyasi bilan shartnoma imzolagan. Uning 28 avgust kuniga mo'ljallangan jangini ham aynan "Golden Boy" tashkil etmoqda. Bu haqida ushbu promouterlik kompaniyasining rasmiy sahifalarida xabar berildi hamda rasmiy poster ham taqdim etildi.   

Meliqo'ziev oqshomning asosiy anderkardi doirasida ringga ko'tariladi. Uning raqibi meksikalik bokschi Alan Kampa bo'ladi. 28 yoshli Alan prof ringda 23 ta jang o'tkazgan bo'lib, ularning 17 tasida g'alaba qozongan. Beshta jangda mag'lubiyat (2 ta nokaut) alamini totib ko'rgan. O'zi esa 11 ta bahsda raqiblarini muddatidan avval taslim etgan. So'nggi jangini 2019 yilning 2 may kuni Erik Baziniyanga qarshi o'tkazib, mag'lubiyatga uchragan edi.  

Bektemir Meliqo'ziev esa faoliyati davomida 5 ta jang o'tkazib, barchasida zafar quchgan. To'rtta jangda raqiblarini muddatidan avval enggan. So'nggi jangini shu yilning 14 fevral kuni Oskar Kortesga qarshi o'tkazib, nokaut evaziga g'alaba qozongan edi. CHarm qo'lqop ustamiz 28 avgust kuniga belgilangan jangida o'ziga tegishli bo'lib turgan WBA Continental Americas chempionlik kamarini himoya qiladi.