Belbog'li kurash bo'yicha jahon chempionatiga tayyorgarlik ishlari muhokama qilindi

Jismoniy tarbiya va sport vazirligida ushbu nufuzli musobaqani o'tkazishga tayyorgarlik ko'rish va uni o'tkazish bo'yicha tashkiliy qo'mita yig'ilishi bo'lib o'tdi.

Yig'ilishda Vazirlar Mahkamasining 2019 yil 29 iyuldagi O'zbekiston Respublikasi Prezidenti sovrini uchun belbog'li kurash bo'yicha 2002-2004 yillarda tug'ilgan o'smirlar va qizlar o'rtasida jahon chempionatini o'tkazish bo'yicha farmoyishida belgilab berilgan vazifalar ijrosi muhokama qilindi.

Yig'ilishni olib borgan, jismoniy tarbiya va sport vaziri, tashkiliy qo'mita raisi Dilmurod Nabiev milliy sport turimiz hisoblangan belbog'li kurash bo'yicha bunday yirik musobaqa birinchi marta o'tkazilayotganligini takidlar ekan, jahon birinchiligini yuqori saviyada tashkil etish uchun barcha imkoniyatlar ishga solinishi lozimligini aytib o'tdi.

SHundan so'ng tashkiliy qo'mita azolari Toshkent viloyati hokimligi, O'zbekiston milliy teleradiokompaniyasi, mamlakat belbog'li kurash federaciyasi, Tashqi ishlar, Sog'liqni saqlash, Ichki ishlar, Madaniyat, Transport vazirliklari va boshqa masul tashkilotlar mutasaddilari musobaqaga tayyorlarlik bo'yicha o'z yo'nalishlarida amalga oshirilayotgan ishlar haqida malumot berishdi.

Xususan, xorijlik mehmonlarni kutib olish, xavfsizlik, musobaqani ochilish va yopilishi marosimidagi badiiy qismlar, transport taminoti, moliyalashtirish, tibbiy xizmat, OAV orqali yoritish kabi masalalar batafsil muhokama qilindi.

Yakunda barcha mutasaddi vazirlik, idora va tashkilotlar vakillari bilan jahon chempionatini yuqori saviyada tashkil etish va o'tkazish bo'yicha rejali ishlarni hamkorlikda davom ettirishga kelishib olindi.

Eslatib o'tamiz, Olmaliq shahrida joylashgan “Olmaliq KMK” AJ sport majmuasi mezbonlik qiladigan chempionatga Germaniya, Isroil,Hindiston, Eron, Xitoy kabi dunyoning 40 ga yaqin mamlakatidan 200 nafarga yaqin sportchilar tashrif buyurishi kutilmoqda.