Belbog'li kurash. Qo'rg'ontepada ochiq turnir o'tkazildi + FOTO

O'zbekiston Respublikasi Jismoniy tarbiya va sport vazirligi hamda O'zbekiston belbog'li kurash federaciyasining yillik taqvim-rejasidagi ushbu ochiq turnirda Qoraqalpog'iston Respublikasi, Toshkent shahri va viloyatlar, qo'shni Qirg'iziston Respublikalaridan bir yuz ellik nafarga yaqin nomdor polvonlar ishtirok etishdi. 

Mazkur Respublika ochiq turnirida erkaklar -73, -90 va +90 kg. vazn toifalarida bellashishdi. Musobaqaning yuqori saviyada o'tishi uchun viloyat hokimligi, viloyat jismoniy tarbiya va sport boshqarmasi, viloyat belbog'li kurash federaciyasi, Qo'rg'ontepa tuman hokimligi tomonidan qizg'in tayyorgarlik ko'rilgani bois, besh ming o'rinli arena belbog'li kurash muxlislari bilan to'lib toshdi. 

CHin manoda sport bayramiga aylangan musobaqada asosan vodiy viloyatlarining ko'zga ko'ringan, nomdor polvonlari bosh sovrinlarga davogarlik qilishdi. Garchi, shu kuni harorat pasayib, sovuq ob-havo hukmronlik qilishiga qaramay, arenaga hatto sig'may ketgan belbog'li kurash shaydolari polvonlarni olqishlashdan to'xtamadi. Alp kelbatli polvonlar esa g'oliblikni tantana qilib, tashkilotchilar va homiylarning qimmatbaho sovrinlariga ega bo'laverishdi.   

G'olib va sovrindorlar:

-73 kg vazn toifasi

1. Ilhomjon Mashrabov (Andijon)

2. Sardor Madaminov (Andijon)

3. Ro'zioxun Ro'zioxunov (Andijon)

3. Murodjon Hamidov (Namangan)

-90 kg vazn toifasi

1. Nodirbek Ahadjonov (Andijon)

2. Husniddin Ro'ziev (Andijon)

3. Maxsim Turg'unboev (Andijon)

3. Muhammadashur Ashirov (Andijon)

+90 kg. vazn toifasi

1. Zohid Ismoilov (Farg'ona)

2. SHerzod Rahimov (Farg'ona)

3. Obidali Mavlonov (Farg'ona)

3. Davron Abdurahmonov (Farg'ona)

Bellashuvlar yakuniga etgach, taqdirlash marosmi bo'lib o'tdi. G'olib va sovrindorlar diplom, medal va qimmatbaho esdalik sovg'alari bilan mukofotlanishdi. Turnirda Andijon viloyati hokimi SHuhrat Abdurahmonov ishtirok etdi.

Ilhom RAHMONOV, o'z muxbirimiz