Belbog'li kurash. Xo'jaobodda O'zbekiston Kubogiga start berildi

O'zbekiston Kubogi bellashularida Qoraqalpog'iston Respublikasi, Toshkent shahri va viloyatlardan 250 nafarga yaqin yosh polvonlar g'oliblik yo'lida kuch sinashishmoqda. Ushbu musobaqada o'g'il bolalar har ikkala yo'nalishda 11, qizlar esa 7ta vazn toifasida bellashishadi.

Bellashuvlarning qizg'in va murosasiz o'tishida viloyat jismoniy tarbiya va sport boshqarmasi, “Adolat” social demokratik partiyasi viloyat Kengashi, Xo'jaobod tuman hokimligi, tuman bolalar-o'smirlar sport maktabi va boshqa jamoat tashkilotlari O'zbekiston milliy belbog'li kurash federaciyasi va uning viloyat bo'limi bilan bevosita hamkorlik qilishmoqda. 

Musobaqa doirasida tashkilotlar hamkorligida o'tkazilgan ochilish marosimi ham tantanavor, bayramona tarzda tashkil etildi. Tadbirda  qatnashgan Xo'jaobod tuman hokimi Otabek Rasulov, Oliy majlis qonunchilik palatasi deputati Muharramxon Dadaxo'jaeva, O'zbekiston “Adolat” SDP Andijon viloyat kengashi rais o'rinbosari Maloxatxon Musaeva hamda O'zbekiston milliy belbog'li kurash federaciyasi raisi Ravshan Dastirovlar so'zga chiqib, musobaqa ishtirokchilarini tabriklab, barcha sportchilarga omad tilashdi.      

Bellashuvlar 30 mart kuniga qadar davom etadi. 

Ilhom RAHMONOV tayyorladi