Bilasizmi? Boks bo'yicha ilk bor Olimpiada kumush medaliga ega bo'ldik

CHarm qo'lqop ustalarimiz hisobida oltin hamda bronza medallar bor edi. Kecha -69 kg vazn toifasidagi final jangida ringga ko'tarilgan hamyurtimiz SHahram G'iyosov terma jamoamizdagi ana shu bo'shliqni to'ldirdi.

O'zbekistonlik sportchilar uchun ilk Olimpiada – Atlanta-96da Karim To'laganov -71 kg vaznda bronza medalini qo'lga kiritgan. 2000 yili Sidney Olimpiadasida Muhammadqodir Abdullaev -63,5 kg vaznda oltin medal bilan taqdirlangan. O'sha yili Sergey Mixaylov -81, Rustam Saidov +91 kg vazn toifasida bronza medaliga sazovor bo'lgan.  

2004 yili Afinada o'tkazilgan Olimpiadada bokschilarimiz terma jamoamiz g'aznasiga ikkita bronza medalini taqdim etishgan. Bahodir Sultonov va O'tkirbek Haydarov Toshkentga bronza medali bilan qaytishgan. 2008 yilgi Pekin Olimpiadasi bokschilarimiz medal olmagan yagona olimpiya o'yinlari bo'lib turibdi.

2012 yili Londonda o'tkazilgan to'rt yillikning eng nufuzli musobaqasida bokschilarimizdan Abbos Atoev bronza medaliga ega chiqqan. Rio Olimpiadasida esa charm qo'lqop ustalarimiz barcha rekordlarni yangilashdi. Yana to'rt nafar bokschimiz medallar uchun kurashni davom ettirmoqda. Umid qilamizki, Hasanboy Do'smatovning oltin medali yagona bo'lib qolmaydi.