Bir jang tarixi: Ruslan CHagaev vs Vladimir Klichko!

2009 yilning 20 iyun kuni Germaniyaning Gelzenkirxen shahridagi "Veltins Arena" stadionida superog'ir vazn toifasida 12 raundlik chempionlik jangi o'tkazilgan. Unda IBF, WBO va IBO yo'nalishlari chempioni ukrainalik Vladimir Klichko WBA chempioni Ruslan CHagaevga qarshi ringga ko'tarilgandi. 

O'sha jangda o'rtaga faqat Vladimir Klichkoning barcha chempionlik kamarlari qo'yilgandi. SHuningdek, vakant bo'lib turgan The Ring jurnali kamari ham g'olibga taqdim etilardi. Ikki haftalik qisqa ogohlantirish bilan jangni qabul qilgani uchun CHagaevning chempionlik kamari o'rtaga qo'yilmagan edi. 

Ikkinchi raundda Vladimir Klichko jangga tayyorgarliksiz chiqqan charm qo'lqop ustamizni nokdaun holatiga tushirib qo'ydi. To'qqizinchi raunddan keyin esa CHagaevning murabbiylari jangni davom ettirmaslikni lozim topishdi. Jang to'xtatilguniga qadar Klichkolarning kichigi uchchala hakam hisob-kitobiga ko'ra g'alaba (89:81, 90:79, 88:82) qozonayotgandi.

Ushbu jangni Germaniyaning o'zida 11,5 million kishi RTL telekanalida, 7,5 million kishi Inter kanalida tomosha qilgan. 

— 2009 yilda Vladimir Klichkodan faoliyatingizdagi ilk mag'lubiyatni qabul qilib oldingiz. O'shanda jangga qisqa ogohlantirish bilan chiqqan edingiz. Mag'lubiyatingizning asosiy sababi shu bo'lganmidi?

— Ha, men o'sha jangni ikki haftada qabul qildim. Ammo men hech narsadan afsuslanmayman, chunki bunday imkoniyat hech qachon nasib etmasligi ham mumkin edi. Umuman olganda, men hech qanday zararli emasligimni va men bilan jang qilish mumkinligini butun dunyoga ko'rsatishga yordam bergani uchun Vladimirdan minnatdorman. Bo'lmasa, hamma Valuevning gapiga ishonib qolardi. Nikolay Valuevni mag'lub etganimdan keyin u meni toza jang o'tkazmaydi deb butun dunyoga jar solgandi. Klichko bilan jang bo'yicha hech qanday savol yo'q, Volodya haqiqatan ham juda zo'r bokschi, u raqiblarini his qiladi, u ringda ko'p harakat qiladi. Ehtimol, to'liq tayyorgarlik ko'rganimda yaxshiroq chiqish qilardim va manzara boshqacha bo'lardi, lekin umuman olganda, natijaga shubha yo'q.