Birinchi raketkamiz 20 ta eys amalga oshirilgan 1/2 final uchrashuvida kortga chiqdi

O'zbekistonning birinchi raketkasi Sergey Fomin biroz avval yakuniga etgan 1/2 final uchrashuvida musobaqada uchinchi raqam ostida tasniflangan xitoylik Sun Fajingga qarshi kortga chiqdi. Sun 1/8 finalda O'zbekistonning ikkinchi raketkasi Humoyun Sultonovni mag'lubiyatga uchratgan edi. 

Afsuski, reytingdagi tafovut 1/2 finalda ham o'z so'zini aytdi. Dunyoning 244-raketkasi bo'lib turgan mezbon tennischi arenaga yig'ilgan vatandoshlari qo'llab-quvvatlashi yordamida final yo'llanmasini qo'lga kiritdi. Etmish sakkiz daqiqa davom etgan bahsda Sun ikki setda ham bir xil hisobda g'alaba qozondi - 6/4, 6/4. 

Ikki tennischi uchrashuvida jami 20 ta eys qayd etildi. Sergey 12, Sun 8 ta eys zarbasiga mualliflik qildi. Qo'shxatolar hamyurtimizda bittaga ko'proq bo'ldi - 2 ga 1. Fomin ayni paytda dunyoning 383-raketkasi bo'lib turibdi. Bu tennischilarning o'zaro o'tkazgan ikkinchi uchrashuvi bo'ldi - 1:1. Fomin o'tgan yili Xitoyning boshqa shahridagi turnirda Fajingni mag'lub etgan edi.