Bobousmon Baturov: "Vaqtim keldi. Imkoniyatni qo'ldan boy bermoqchi emasman"

"Ayni paytda Toshkent viloyatidagi "Yangiobod" o'quv bazasida shahsiy murabbiylarimiz va terma jamoadagi ustozlarimiz boshchiligida mashg'ulotlarga zo'r berganmiz. Oldimizda Olimpiya o'yinlariga yo'llanma beruvchi licenzion musobaqa turibdi. Hozircha tarkib to'liq aniqlanmagan. Yaqin orada -63 kg va -69 kg vazn toifalarida sparring janglar tashkil etiladi va shundan so'ng musobaqada ishtirok etadigan bokschilar nomi malum bo'ladi. Mening vaznimda SHahram G'iyosov ham havaskor boksga qaytdi. Unga qarshi jang qilaman va g'olib licenzion musobaqada ishtirok etadi. 

Men barchasiga tayyorman. Kimdir kumushni oltin qilmoqchi bo'lsa, kimdadir Olimpiadada ishtirok etish va oltin medal qo'lga kiritish orzusi bor. Barcha narsaning o'z vaqti soati bor. O'ylaymanki, mening vaqtim keldi. Men imkoniyatni qo'ldan boy bermoqchi emasman. Barchasi Ollohdan, kimga nasib qilgan bo'lsa o'sha boradi. Men ham eng kuchli bokschi Olimpiadaga borishi tarafdoriman. CHunki, barchamizning maqsadimiz vatanimiz bayrog'ini yuqoriga ko'tarishdir. 

Qolaversa yurtboshimiz menga ishonch bildirdilar. Ularga ham Olimpiada oltin medalini olib kelaman deb vada berganman.

Hozirda meni JCHda angliyalik raqibimga imkoniyatni boy berib qo'yganim uchun tanqid qillishmoqda. Bahona emas, lekin jangdan bir kun oldin kasalxonaga tushganim jangda pand berdi. Ayni paytda men ajoyib sport formasidaman. Meni qo'llab-quvvatlayotgan barchaga rahmat aytaman. Xudo xohlasa ishonchingizni oqlayman", - dedi Bobousmon Baturov.